Sunday, December 23, 2007

شوية رباعيات للمعلم جاهين ...وعجبى






مع ان كل الخلق من أصل طين
وكلهم بينزلوا مغمضين
بعد الدقايق والشهور والسنين
تلاقى ناس اشرار وناس طيبين



عجبى عليك .. عجبى عليك يا زمن
يا بو البدع يا مبكى عينى دماً
إزاى انا أختار لروحى طريق
وأنا اللى داخل الحياة مرغماً



مرغم عليك يا صبح مغصوب يا ليل
لادخلتها برجليا ولا كانلى ميل
شايلنى شيل دخلت انا فى الحياة
وبكرة ح اخرج منها شايلنى شيل



سنوات فايتة عليا فوج بعد فوج
واحدة خدتنى إبن والتانية زوج
والتالتة اب خدتنى والرابعة ايه
إيه يعمل اللى بيحدفه موج لموج؟



نظرت فى الملكوت كتير وانشغلت
وبكل كلمة(ليه؟)و(عشانيه؟) سألت
اسأل سؤال .. الرد يرجع سؤال
واخرج وحيرتى أشد مما دخلت



خرج ابن ادم العدم قلت: ياه
رجع ابن ادم للعدم قلت: ياه
تراب بيحيا .. وحى بيصير تراب
الاصل هو الموت والا الحياة؟



ضريح رخام فيه السعيد اندفن
وحفرة فيها شريد من غير كفن
مريت عليهم..قلت يا للعجب
لاتنين ريحتهم فيها نفس العفن



ياما صادفت صحاب وما صحبتهومش
وكاسات خمور وشراب وما شربتهومش
أندم على الفرص اللى انا سبتهم
والا على الفرص اللى ما سبتهومش



يا باب يا مقفول .. امتى الدخول
صبرت ياما واللى يصبر ينول
دقيت سنين والرد يرجعلى: مين؟
لو كنت اعرف مين انا .. كنت أقول



انا شاب لكن عمرى ولا الف عام
وحيد ولكن بين ضلوعى زحام
خايف ولكن خوفى منى أنا
أخرس ولكن قلبى مليان كلام



سهِير ليالى وياما لفيت وطفت
وف ليلة راجع فى الضلام قمت شوفت
الخوف .. كأنه كلب سد الطريق
وكنت عاوز اقتله .. بس خفت



عجبتنى كلمة من كلام الورق
النور شرق من بين حروفها وبرق
حبيت أشيلها ف قلبى .. قالت حرام
ده انا كل قلب دخلت فيه اتحرق



قالوا الشقيق بيمص دم الشقيق
والناس ما هياش ناس بحق وحقيق
قلبى رميته وجبت غيره حجر
داب الحجر.. ورجعت قلبى رقيق



يوم قلت اه.. سمعونى قالوا فسد
دهكان جدع قلبه حديد واتحسد
رديت على اللايمين انا قلت .. اه
لو تعرفوا معنى زئير الاسد



دخل الربيع يضحك لقانى حزين
نده الربيع على اسمى لم قلت مين
حط الربيع أزهاره جنبى وراح
وإيش تعمل الازهار للميتين

No comments: